茶記冰室 (已結業)

石蔭呢邊出名多茶餐廳，其實茶餐廳都好多好野食，而且每間各有特色，日日可以食唔同既口味，都幾幸福~茶記冰室都算新開，呢間比較多特別野，懷舊野，炸野，多功夫既野食，之前次次叫外賣飯盒，其實平時經過見到佢黃金蝦，蝦多士，冰鎮咕嚕肉都好想試下，呢d要即叫即食至好食，今晚早收工就入去食啦~叫左兩個餐，加一個咕嚕肉，跟餐有熱飲，白飯同老火中湯，中湯味唔太咸，岩我口味~招牌黃金蝦 $78呢個係周年減價既價錢，仲包左湯飯熱飲，我覺得幾抵，平時出面食黃金蝦都唔平~呢個蝦唔算大隻，勝在份量多，新鮮爽口，蝦殼脆卜卜可以連殼食，落足咸蛋黃去炒，咸香十足~松子菊花魚 $98另外叫左個茶餐廳少有既松子魚，已起骨，淡淡肉外皮脆，魚肉嫩，醬汁酸酸甜甜，加入松子增加香脆口感~冰鎮咕嚕肉 $88呢個更加係茶餐廳少見，相信工序都幾多，個碗中間有一層用來將咕嚕肉同溶左既冰水分隔，本來以為冰會令咕嚕肉既皮變淋，點知食到最後一件都係非常脆~一咬落去極脆，表面有冰凍感，好有驚喜平時好怕咕嚕肉既炸漿過厚，但呢個因為真係好香脆，反而覺得個皮厚都好好食至於入面既肉，就比較普通~下次要試埋羊腩煲，蝦多士同墨魚餅