悠然軒 (已結業)

星期三再與同事去悠然軒食午餐，當日有4款選擇，包括椰香咖哩雞、香芒龍利、牛肉炒烏冬及焗豬扒飯，連餐湯及飲品，每款$32-$33〈因為我有印花，每個餐可以減$2，超抵〉。之前我已試過椰香咖哩，好好味，故向同事推薦；自己就試新野，選了香芒龍利，加熱咖啡；原來點薄荷茶作餐飲不另加費，同事於是點了薄荷茶。仲加$5點了菠蘿布甸。當日餐湯普普通通，但同事勁讚咖哩好味，平日食少少飯的她，結果成碟食曬。香芒龍利飯係超好味，飯同主菜分開上，賣相靚，除了芒果，仲有菠蘿同青椒，顏色吸引，味道酸酸甜甜，龍利亦十分美味。只係30多元，絕對係誠意之作！更何況今次坐近落地大玻璃位置，一邊睇避風塘景，一邊吃，超值享受。薄荷茶用有機薄荷葉泡製，飲起上來很放心，薄荷味恰到好處，同事又大讚一番。菠蘿布甸亦好好味。據聞餐廳大廚經常轉換午餐款式，就算成日幫襯都可以有意外驚喜啦！