燒烤堂 (已結業)

通常去紅磡食串燒都會去美味佳，今次同男朋友試下黃埔站附近嘅燒烤堂。店舖座位不多，牆身擺左日本清酒，做緊七折優惠好抵呀，可以一邊食串燒一邊飲酒！食物選擇多元化，串燒以外仲有刺身、炸物、一品料理等，價錢亦大眾化。黑豚肉韭菜花卷做得非常出色！薄薄嘅豚肉包住鮮嫩韭菜花，咬落爽脆無渣。豚肉燒得微微焦脆，油香滿載，韭菜花中和左肉嘅膩感。去親串燒店都會叫茄子，蒜蓉燒茄子同樣有水準！食嘅時候可以一梳梳咁食，茄子腍滑唔乾身，而且帶有濃濃蒜香~好多時候茄子皮會燒到燶曬，但呢個絕對可以連皮食。自家製煎餃子每日限量發售，下一台客人想叫已經賣晒。我諗會自己包餃子嘅串燒店唔多，我幾欣賞小店呢份心思。餃子皮薄餡鮮，咬落多汁，不過餃子煎得唔夠香脆，偏油膩。每次叫大蔥雞肉串係為左大蔥！大蔥鮮甜爽脆，雞肉肉質嫩滑，掃上濃郁醬汁更惹味！麻辣炒鴨舌比想像中細份，入口重麻香，做佐酒小食都唔錯。必點沖繩黑糖燒菠蘿！菠蘿表層焦脆無比，咬落香甜多汁，多左一份甜蜜嘅滋味！果然係招牌菜之一，好想叫多幾串呀！呢間串燒店以熟客居多，我見店員都已經認得出佢地，仲有傾有講。