One More Hotpot 來一鍋 (已結業)

最近天氣凍咗好多， 得返十幾度 ，問我食乜好，梗係打邊爐啦。呢個銅鑼灣新開嘅打邊爐店叫one more， 海鮮火鍋套餐任食兩個半鐘，每人三百幾蚊， 都好抵食。入到去環境都好舒適，仲見到好多房間，可以book房過生日或者慶祝，我地就坐係卡坐，店員好有禮貌地介紹咗menu，先選左湯底，勁正丫，有 花膠螺頭雞鍋即點呢個。湯底好鮮甜足料， 花膠好多，個餐仲包左海鮮拼盤， 有扇貝 ，鮑魚， 大蝦 ，青口，珍珠蚌， 象拔蚌， 有殼蠔。 全部海鮮都好新鮮， 象拔蚌落去煮嘅時候仲識郁， 蝦嘅腳都有啲郁，肉質爽口彈牙，扇貝又好大隻，整碟海鮮都非常滿意。肉類方面，有西班牙黑豚肉， 手切安格斯牛脊肥牛，兩樣都超好食， 黑豚肉肥瘦適中，肥牛牛味濃，入口即溶， 諗番都好回味。至於任食方面， 我最欣賞佢有好多菜類選擇， 超過十款， 例如娃娃菜，皇帝菜， 豆苗，生菜， 油麥菜，菜心苗， 西洋菜都有，食完肉同海鮮食返條菜好舒服， 其他任食配料仲有脆鯇腩，雞件，雞子都有，係任食嚟， 非常抵食呀。整體嚟講，樣樣都好滿意，食得好飽好滿足，價錢又合理，下個月朋友生嚟book返間房再食先。