鼎記 (已結業)

成日經過呢條街，見呢間新面口鼎記，門口一大個牌棟喺度推介招牌鴨腩麵，望落都幾有趣，咁就入去一試。其實呢間食肆主打車仔麵、燒咪同幾款粥品，我就決定叫招牌鴨腩麵要油麵，大佬就叫咗個絕鼎咖喱牛腩飯要大辣。鴨腩麵顧名思義係燒鴨同腩，腩係牛腩，件件大大嚿，咬落軟淋冇渣，可惜牛腩味欠奉，只覺得自己食緊肉類。燒鴨同一般燒腊店無異，皮當然唔會脆啦，皮下脂肪過剩，咬落去成口油，而且啲鴨肉韌到不得了，我個人咬唔開，俾大佬試試，佢都不約而同選擇放棄。湯底類似一貫車仔麵清湯，但係淡而無味。反而跟麵另上碗節瓜鴨湯仲好味。而咖喱牛腩飯啲牛腩口感同就同以上鴨腩麵個腩一樣，只不過煮喺咖喱汁度，所以味道咪只嘗到咖喱。咖喱汁濃稠，味道單調，內有少量洋蔥同幾件薯仔。大辣應該係嚟自落咗大量辣紅油，所以成個碟都係油好肥膩。而辣度喺啱啱入口時有少少刺激，不過後勁就冇咩。飲品方面叫咗凍檸茶。食物份量都幾足，目測到隔離檯都係算大大碟，要食飽一定冇問題。場內檯與檯都幾貼，好在嗰日食晏時段之前去到，有卡位就寬敞啲。冷氣就好不足，可能因為門常開關係。向服務員提出開大啲冷氣嘅要求，佢哋都算樂意配合。當我哋食完離開時，正值食晏時段，都坐無虛席