伊甸 (已結業)

觀塘其實好多好野食，今晚就搵到間同地鐵站只有一分鐘步行距離嘅台式料理cafe，特別推介一下！平時响地鐵月台都會見到呢間 “伊甸”，木系裝潢簡潔明亮，牆身有特別中文格言，亦有唔同枱櫈高度任君選擇 （對窗外境嘅bar枱、矮圓枱、長枱)。坐低後見到餐具都刻咗 eden，整齊又有型格！同朋友各自點咗 “特盛台式雙餸套餐”，好抵食！秘製辣肉碎、乾拌新竹米粉 - 好鍾意呢個配搭，未撈個肉碎時，已經聞到米粉淡淡米香味，而個肉碎汁香辣滋味到可以令我食晒一大碗米粉！醬炆豬軟骨肉質淋，魚肉春卷就似炸咗嘅長型魚蛋，每樣份量啱啱好，又可以試唔同野☺️朋友嘅台式香菇肉燥上碟時已放在新竹米粉湯裡，一樣清香爽口。試咗個清湯牛肋條，仲有牛筋! 都炆得好入味😋而台灣腸就有微辣嘅黑椒帶出滋味。涼拌小食有酸蘿蔔同埋辣菜，醒神開胃。跟餐仲包埋波霸奶茶🧋，抵晒！食完兩餸麵餐先叫店員上甜品，好期待呀！果然無令我失望，紅豆甜、仙草撈淡奶、煙煙韌韌嘅芋圓係台灣經典甜品🍡 朋友嘅黑糖花生麻糬都特別，外層係黑糖啫喱、甜而不漏，包住濃郁花生餡料，實在係花生醬控嘅至愛🥜今晚真係飽到捧住個肚腩走！