Planet - Italian Restaurant & Bar (已結業)

上星期五早放，同兩個同事相約去happy Friday。但係觀塘冇乜環境靚，又有feel嘅餐廳，來來去去都係嗰幾間，好在咁啱俾我哋發現呢間新開嘅餐廳，喺觀塘海旁對面。我哋去到嘅時候仲早，落地玻璃窗令到成個環境好明亮，打卡影相都靚啲😂。餐廳入面嘅裝修都幾靚，如果可以睇到海景就更好啦。呢間餐廳唔係嗰種香港version嘅西式餐廳，而係幾正宗嘅意式style，所以啲嘢食唔會好多花臣，但係味道好好，喺觀塘少之又少。佢嘅前菜不過不失，幾多蔬菜選擇，比較健康。而我最鍾意佢嘅Pizza🍕同意粉🍝。佢嘅Pizza係薄批少少燶底，好香口，面頭落咗超多芝士，每一塊都可以拉絲拉到好長，未食睇到都覺得好正。意粉都係好正宗嘅意大利風格，啲汁啱啱好包住所有意粉，口感彈牙，真係Al dente 嘅。食完之後發現可以坐喺餐廳出面嘅露天位置，飲住cocktail都唔錯。諗住同同事下次happy Friday再嚟試吓。