驚安燒肉商店

營業中

休息中

餐廳位於尖沙嘴，佔地4000呎，主打日式燒肉料理，除此之外更有海鮮、主食、小食、飲品同期甜點供應。雖然係單點但價錢經濟實惠，叫多幾碟都唔怕肉赤，適合約朋友仔嚟聚餐😆前菜有和風柚子凍蕃茄，味道酸甜十分開胃、薯仔沙律堆到成座山咁，入口綿密，醬汁足夠，食到舔舔脷。枝豆無額外調味，感覺更健康，不過重口味人士未必適合，可自己額外加鹽調配。值得一讚係個小食，粟米天婦羅都係第一次見，店員喺隔離即場製作，要啲時間請耐心等候🤣 外層酥脆，粉漿薄身，粒粒口感，都幾唔錯。另外有牛油蜜糖蕃薯條，甜甜哋唔覺唔覺就食晒。必點之選有九宮格燒牛盛合，睇得又食得，集合九款牛肉，啱晒有選擇困難症同貪心嘅大家。個人喜歡和牛赤身同極黑和牛，入口即溶，鮮嫩多汁，記住睇實個火，唔係嘅話會嘥咗塊肉。其他肉類都唔輸蝕，豬頸肉厚度啱啱好，肉質爽口彈牙、柚子漬雞肉山超級大份，肉質嫩滑多汁，啖啖肉好滋味。手羽有四件，可以自己拆開變單邊骨，更加容易燒。甜品方面要咗菠蘿，八大件自己燒，燒至微微焦香，酸甜開胃又無渣，如果配埋蜜糖就好啦。另外有柚子檸檬芝士蛋糕，入口細膩，甜甜哋，正常發揮，過過口癮，為呢餐做個完美嘅Ending。