浜滝 (已結業)

今晚跟住媽咪同親戚食飯，諗住又要悶一晚，但居然係食日本野，仲要係又新潮、又開心。呢到既裝修好正，好有型, 好似真係去左日本既居酒屋咁。燒芝士年糕，燒得好透，熱氣野就最啱我，用紫菜包住食，外面脆卜卜，裡面就QQ地夠彈牙，我一個人仲獨吞左兩個。成晚食咁多野，樣樣野都好好食，沖繩冰鎮鮑魚，新鮮、甜美、爽脆，充滿海水味，配上輕輕微微既酸汁，真係好係沖繩暢泳緊咁。全晚高潮就係火炙海膽龍蝦，新鮮就不在話下，新鮮既海膽龍蝦輕輕用火槍炙過，啱啱好，唔係熟晒，又保留到真鮮味，好戲在後頭，當大家品嚐過後，兩個咁大既龍蝦頭就係我面前，我又點會放過呢，龍蝦頭充滿蝦膏，啖啖都係極品清酒煮大蜆，眼見係全晚最普通既海鮮，但個清酒煮既上湯真係好好味，你話我老土都係咁話，我叫左個白飯撈湯食，正到暈。雖然係親戚請，但我偷睇過張單，食咁多海鮮都係三百蚊一個人頭，都OK抵食。枱面仲放左好多清酒，下次同friend 嚟，一定要試埋呢到既酒。