2
係四季酒店搭lift直上45樓，一出lift見到窗外高層嘅靚景，穿過呢個升降機大堂入去，發現餐廳入口好細。入面原來得8個吧位左右，怪唔得要早3個月預約兼落訂！你地記得要要求吧枱中間位，我地坐側邊，完全看唔到師傅整野食。裝修係正常日式餐廳。環境方面其實我覺得頗逼，同隔離位只有一塊有色透明板隔住，其實係可以接受，不過作爲四季酒店餐廳就有點兒那個。
大家記得唔好遲到，原來餐廳係預算全部客人一齊同時食同一個菜式，等師傅可以一次整多人份量。我地大鄉里，遲左20分鐘已經比服務員打電話催。最後遲左25分鐘，要趕快食追返上進度，不過我一向都食得快，無問題。
1
一坐低，已經見到枱面擺好調味料，仲有餐巾，白信封比你放口罩，同熱毛巾比你抹手。服務員問我地想飲咩，我地叫左熱水，唔知凍水或凍茶收唔收錢。
1
南瓜湯，慢煮鴨胸，蝦肉芋頭配豆腐芝麻醬
然後服務員就上左前菜比我地，當然有逐一介紹。左起南瓜湯，慢煮鴨胸，同蝦肉芋頭配豆腐芝麻醬。
1
南瓜湯
迷你南瓜湯超甜又濃厚，份量只有幾啖。
1
慢煮鴨胸
慢煮鴨胸好嫩，我鍾意鴨胸上面甜甜地既汁。鴨胸下面墊有水菜。
1
蝦肉芋頭配豆腐芝麻醬
蝦肉1開3，芋頭兩粒，老實講就唔太特別。豆腐芝麻醬好creamy，豆腐濃過芝麻味，上面居然加左少少櫻花，令成個味道好特別。
1
白海老炸蝦頭
同一時間，港人師傅就上左第一道天婦羅比我地（因爲我地遲到既關係），係白海老炸蝦頭。好多隻迷你白海老刺身放左係紫菜天婦羅上面，最頂加左少少芥末。食落味道質感都唔錯，有薄脆有鮮甜，不過未算驚喜。炸蝦頭當然香脆，可惜無蝦膏，美中不足。
1
食完前菜之後，服務員就上左蘿蔔蓉天婦羅汁比我地，亦介紹左各款調味料。
1
左起係青檸（適用於海鮮），中間係加左冬菇同昆布既鹽，右邊係九州鹽。九州鹽較爲鹹少少。個人覺得呢d調味料完全無必要，一定係食食材既原味最好。最右邊就係用黎裝食剩嘅蝦殼等。
1
車海老
第二道天婦羅就係車海老。黎得呢d頂級天婦羅餐廳，天婦羅炸皮夠薄係指定動作，呢度既炸皮基本上係可以用唔存在黎形容。車海老肉質彈牙，不過都係個句，未有驚喜。
1
蓮藕
第三道天婦羅係蓮藕。蓮藕天婦羅我係第一次食，味道係唔錯，不過都係無驚喜。
1
紫蘇葉海膽
2
登登登登！終於等到我最期待既紫蘇葉海膽天婦羅。自從多年前係稻菊試過紫菜包海膽天婦羅就真係一試難忘。呢度用紫蘇葉代替紫菜，我覺得分別不大。服務員建議我地先試原味，之後先加鹽，我當然完全唔需要加鹽食。紫蘇葉入面超多海膽，海膽滑溜creamy，雖然鮮味被炸皮掩蓋，不過炸皮既香脆口感同大量海膽既滑溜creamy口感簡直係無得頂！
1
我地忍唔住之後每人encore左一件，多謝位位$280再加一。食完覺得好邪惡。
1
大黑本菇配松露鹽
第五道天婦羅係大黑本菇，配左個松露鹽。大黑本菇有半大隻，松露鹽都幾特別下，真係有松露味。
1
津和井蟹湯葉卷
第六道天婦羅係津和井蟹湯葉卷，由服務員送上。呢道菜賣相唔錯，兩舊蟹肉卷用吉列脆皮包住，果然啖啖蟹肉，蟹味香濃。配菜有邊豆同紅椒天婦羅。個汁係忌廉汁，有蟹肉同洋蔥粒係入面，好滑不過都幾膩吓。
3
吞拿魚赤身刺身
食完幾道天婦羅，呢個時候真係好需要一d清新少少既菜式去清一清味蕾。師傅真係貼心，呢個時候安排刺身，由服務員送上。吞拿魚赤身刺身有兩塊，伴有芥末。一塊赤身燒過，加左昆布同蔥花。服務員建議食左未燒過嗰塊先。雖然味道上真係無特別，不過都欣賞師傅心思同埋將刺身用刀戒開多刀肯定唔會難咬。
1
鮫魚
刺身之後就返到天婦羅。第七道天婦羅係鮫魚，由服務員送上。鮫魚兩件，伴有薑芽，灑上七味粉既蘿蔔蓉，同檸檬。服務員建議加埋蘿蔔蓉一齊食。鮫魚本身超嫩滑，最入面係未熟架，仲有少少生，魚味鮮甜！加埋蘿蔔蓉又真係好食d，味道質感多d層次。
1
我地之後encore左一客分享，價錢係$220，服務員話材料只剩最後一客，好彩。
1
小蘿蔔配三文魚籽
1
第八道天婦羅係小蘿蔔配三文魚籽，用左一套好精緻既日式碗仔裝住，由服務員送上。服務員建議用匙羹一齊食小蘿蔔同三文魚籽。小蘿蔔天婦羅唔係平時清爽脆口嗰啲，比較暖同實，個人就唔太鍾意。平時嗰啲三文魚籽死鹹，而呢個係完全唔鹹，不過個人覺得鮮味唔夠。整體而言，個人對呢道菜式有d失望。
1
帆立貝
1
第九道天婦羅係帆立貝，都係由服務員送上。帆立貝一大隻好厚身，中間係未熟透既，肉質好嫩。個湯好厚身，加左好多紫菜碎同白芝麻粒，未食先聞到好香紫菜味。服務員建議帆立貝可以同上面凍凍哋同酸酸哋既香菜一齊食，果然係多重口感同味道。個湯就偏鹹，同帆立貝一齊食就唔覺太鹹，但係唔可以清空個湯。
1
舞茸菇
第十道天婦羅係舞茸菇，終於由師傅奉上。舞茸菇大大件，師傅建議配蘿蔔蓉天婦羅汁。菇味好香，果然配蘿蔔蓉可以帶出個菇味，味道更好！
1
海鰻
第十一道天婦羅係海鰻。海鰻肉質好嫩，不過無驚喜。
1
漬物
食左咁多香口嘢，個口真係好熱，呢個時候真係應該要食返d凍野。服務員送上漬物，包括白蘿蔔同青瓜各兩塊同紫心蘿蔔一塊。可惜個人覺得漬物味道太鹹，唔夠甜。
最後呢道天婦羅可以揀配飯或者素麵，我同同行友人一人一樣分享。
1
天婦羅配飯
天婦羅蝦餅明顯食到蝦，另外仲配蔬菜一齊炸，質素唔錯不過唔太驚喜。我鍾意個飯，飯粒飽滿，稔得黎唔會痴埋一齊，加埋甜甜哋嘅汁，好好食。份量係少食多滋味。個碗係超熱，幫助保溫。
1
另一點我鍾意飯多啲係因為佢跟左個湯，味道似麵豉湯不過冇咁濃，入面勁多爽滑菇仔同有少少香草，好正！
2
天婦羅配素麵
服務員會自動將天婦羅蝦餅同素麵分開上，等塊餅唔會被個湯浸稔。素麵超幼身，味道質感無特別，個湯帶微微既鰹魚味道。配左個柚子胡椒，不過個人覺得柚子胡椒味道太濃所以又辣又鹹，可能要加係個湯度攪拌好先食。
1
番薯天婦羅配牛奶雞蛋雪糕
最後呢道甜品真心驚喜。首先上枱時候係勁出煙（影唔切相），應該加左乾冰效果。然後原來連甜品都係天婦羅，係兩件番薯天婦羅，炸得皮脆肉厚，食落啖啖澱粉。牛奶雞蛋雪糕係自家製，賣相其實溶溶哋，不過原來呢種質感配番薯天婦羅係好好味道。一冷一熱，一脆一溶，絕配！上面仲加左少少紅色花瓣裝飾一下。
總括而言，呢個質素既天婦羅，除左以前既稻菊，我真係唔知香港邊度可以食到，當然我並唔係食天婦羅專家，大家請指教。雖然唔係每道菜式都有驚喜，但係整餐飯黎講我都覺得滿意。特別一提係服務方面，服務員同師傅真係好有心，令我地成餐飯都食得好開心，明顯餐廳真係對客人關懷備至，照顧周到。時間掌握方面係完美，準時2點放人。所以呢個$1480加一既套餐價錢我覺得以成餐飯作爲一個experience黎講係值得既，當然天婦羅唔可以成日食，太熱氣啦。大家想黎就記得3個月前訂位啦！
