莊園韓國料理 (已結業)

實在好味, 其實原先小妹同朋友一行3人係打算去金馬倫道另一間韓國料理度開餐, 點知...唔好彩既係個間要小型內部裝修無開, 我地就唯有行去韓國街揾第二間食!想起其中一位朋友話食過一間好味, 我地就入去試下! 7:00PM左右已經坐滿晒人, 我地好好彩地最後一枱有位就唔使等! 入到去見人人都有十數碟既小食已經非常吸引, 不過店員提我地要一次過叫食物佢就會送多D(唔知係咪呢?) 但我地3個人第一轉只叫左一碟牛肋骨同豬肋骨, 都已經有十幾碟, 包括魚乾仔,泡菜, 泡菜味豆腐, 吞拿魚, 韓式燒碟, 大豆芽菜 X 2, 薯仔, 好好味韓式炒粉絲, 菜, 唔知咩黎既蒟蒻! 前菜已經好好味, 一黎燒肉就 食指大動, 好好味! 我地又唔想用白飯黎送飯, 所以叫左個韓式石頭鍋飯, 黎到有專人幫你炒同分埋飯, 好貼心既服務! 飯係有少少飯焦, 再加埋香口既韓國辣椒醬, 一流呀!食到尾聲仲見到牛肋骨有款叫超級牛肋骨, 睇落去仲超正, 所以我地未埋單已經諗住要再黎食嘞!埋單3位只係 $390.- 好合理仲要唔好睇叫咁少野, 其實飽到行唔郁! 推介大家試試!但記得一係早去, 一係要BOOK位嘞!