阿佳拌麵 (已結業)

今日去西九龍中心行街，去到8樓美食廣場，發覺原來裝過修，多咗一排新食肆，行咗個圈，見到間主打台灣食物嘅（阿佳拌麵），見咁耐冇去過台灣，一於試下啲台灣美食解下相思之苦。間嘢以拌麵為主，但都仲有其他選擇，有飯有麵線，有好多唔同選擇，仲有四款唔同味揀，有原味/芝麻/麻辣/沙茶4種味道揀。蚵仔麵線：好足料，蠔仔有好多粒，一啲都唔煋仲好鮮甜，麵線好滑，入口即溶。貴妃烤雞卷拌麵：呢個麵底我揀咗麻辣味，個面好彈牙，佢哋個烤雞卷烤到外皮好香脆內裏好juicy。五香糯米雞卷拌麵：外皮燒到好香脆，包住糯米好入味同好煙韌，一條真係唔係好夠喉。烏來烤豬肉腸拌麵：烤豬肉腸超級好食，一咬落去爆曬汁，好濃豬肉味，同台灣食嘅一模一樣。