串串小食 (已結業)

今日乘高鐵出遊，臨上車前，買左幾款香港特色既街頭小食，在車上慢慢品嚐。餐牌選擇都幾多，除左港式小食，仲有新出既港式風味飯，加$8可以加配汽水。滑滑腸粉：腸粉夠滑，店員好有經驗，剪得大小剛好，加點甜醬麻醬就已經好吸引。咖喱魚蛋：粒粒爽口彈牙，外表金黃，加埋自家製咖喱醬，香辣惹味。魚肉燒賣：煙韌有魚味，豉油及辣椒油加分不少。潮州粉果：粉果皮唔算好厚，入邊既餡都隱約可見，有沙葛、肉碎、花生，加埋個辣椒油簡直係絕配。碗仔素翅：材料豐富，有冬菇絲、竹笙、雞絲、木耳絲，濃稠度適中，灑上麻油、胡椒粉、醋，風味十足。生炒糯米飯：配料有臘腸、蝦米、冬菇、雞蛋絲，飯粒乾爽鬆軟。總結，小食店靠近西九龍高鐵站離港大堂，食物價錢公道，係站內既平靚正選擇。