Cocoon (已結業)

觀塘工廈真係愈黎愈多高質又抵食既餐廳，就好似呢間新開張既西餐餐廳，幾位年青人管理既食物製作一D都唔馬虎，座位舒服光線充足，西餐價錢唔算特別貴，CP值爆晒燈。餐廳有小食/主餐/串燒，選擇上都真係唔少可以揀，而且仲有素食餐可以揀，可以同時迎合唔同口味既人。紅酒牛肋條燴意粉 $88今次叫左個紅酒牛肋條燴意粉，套餐係有包沙律菜同一杯熱飲，不過專員另外加左$8叫左杯凍手搖咖啡。沙律菜有1/4隻蛋，沙律食落係爽脆新鮮既。凍咖啡好夠大杯，味道上未至於特別香但唔澀而且帶住陣陣既果香，所以就算+$8都絕對抵飲。紅酒牛肋條燴意粉份量都幾大，意粉煮得岩岩好，夠煙韌。牛肋條既量亦都唔少，大概有6條左右，肉質煮到好軟稔，而且成個紅酒同蕃茄既味道燴晒入去，基本底味夠香而且醬汁味道適中唔會太酸。不過如果再多少少醬汁就更好，咁樣就唔怕個意粉愈食愈淡。總結:小店製作夠認真，選擇夠多，西餐既價錢唔算貴，份量交足功課，味道上符合大眾口味，期待有更多特色既菜式推出可以係同區拼出。