京味居 (已結業)

唔知點解我覺得好味o既食肆裝修完之後，跌watt多，能保持水準o既少。久而久之，好怕食肆裝修，好抗拒去裝修完o既食肆。天氣涼咗之後好恨食羊，結果去咗從未去過o既巴依餐廳，食完，仲恨食羊，忍唔住返去裝修後o既京味居。菜色都係咁上下，係小菜再冇分SIZE（中/ 小），同價錢略加幾蚊。酸辣湯：有酸有辣，料足，幾好。京燒羊肉：微羶如往昔，但略韌味略淡，皮唔脆肉唔及從前酥香，口感味道比從前遜色。羊肉餃子：仍然幾對口味。拔絲香蕉：呢個比以前好。終於係粒上啦，以前次次都係成堆上，分開可能會整爛外皮，繼而入水；裝水o既碗終於用湯碗啦，可以一次落幾粒，以前用飯碗，要逐粒逐粒落，又慢，水少又快暖，經常搞到外皮唔脆。遺憾唔記得影相，仲有佢由$28加到$35（不過好食咗都算啦）。惟一不變係服務水準。唔係好但又未試過惡言相向。都仲係抵食o既，希望下次來個京燒羊會好食d。