Mee...lemongrass (已結業)

阿媽好鍾意睇大台嘅節目 “街市遊樂園”，三個主持包、美、麗之中，至Like 麥包，搞到老豆都呷晒醋，嬲嬲豬。但係，阿媽一於好少理，之前有一集介紹過 “青衣市場”，是由以前的長發街市變身而成的，見麥包佢哋幫手賣嘢好盞鬼，個市場又大又靚又多嘢賣，就想去八一八，叫我陪佢去"青衣市場" 逛下。都係嗰句啦，阿媽吩咐唔可以托手踭!

Shopping 唔一定要去百貨公司或商場，單係街市都有排你行，好彩個 “青衣市場” 都幾好行，阿媽仲搵到麥包幫手賣生果嗰檔檔主打牙較添。 遊樂完街市之後，都係時候去醫肚，就帶佢行番去青衣城嗰邊。

青衣城都變咗好多，變多咗個二期出來，買嘅、食嘅，咩到有。見到間間食肆都好旺。阿媽問我今次會帶佢食咩新嘢，無懸念……就呢間啦，食馬拉嘢!:)

間嘢旺到呢......! 人頭湧湧，店子唔算太大，但都起碼坐了二百人。

好彩唔使等好耐就有位，拿臨坐低叫嘢食。阿媽望住個餐牌，選擇實在太多，都唔知揀咩好。

1

我就同佢講: “好簡單! 你望下隔離左右啲人食咩，參考下，啱就叫囉!”

 卒之，叫咗 【雜菜喇沙 $58】、【正宗星加坡蝦湯麵 $72】、【緬甸咖哩 (牛) $78】、【花生薄餅 $28】。

就係因為呢幅 poster，阿媽就叫埋杯【馬拉特色手拉茶 (熱) $26】。

我本想叫杯 【Cider Jito】，可惜呢間餐廳是新開無耐，仲未攞到酒牌，咁，我飲水算。

間餐廳都好有效率，好快啲食物、拉茶都上齊。

【緬甸咖哩 (牛)】: 牛腩和牛筋都炆得好腍，咖喱汁有椰奶香，唔太辣。

緬甸咖喱 (牛)

【花生薄餅】: 內裡有些花生碎和沙糖，熱食好好味。蘸埋啲咖喱汁一齊食都唔錯。

花生薄餅

【正宗星加坡蝦湯麵】: 有四隻海蝦，都幾大隻，爽口彈牙。麵是全蛋麵，索埋啲蝦湯，大大箸咁食，好有快感。

正宗星加坡蝦湯麵

【雜菜喇沙】: 即是一碗裡面有蛋麵和米粉的 “參參”，配菜是雜菜、雞蛋、豆卜和芽菜，喇沙湯底椰奶味好夠，又唔辣，啱晒阿媽胃口。

雜菜喇沙

【馬拉特色手拉茶 (熱)】茶味都好夠，仲無出面賣嗰啲咁甜，都OK。

馬拉特色手拉茶

吃飽後，我問阿媽有無預備嘢食備老豆今晚食，佢話今日出門太趕，來不及預備。好彩佢聽肯我勸，喺度買咗個外賣【招牌無骨海南雞飯 $78】返去俾老豆，如果唔係，老豆連電視機都會打爛埋，以後唔俾佢睇麥包。