蘭桂坊車仔麵 (已結業)

入到去餐廳，叫咗個七餸嘅車仔麵。而飲品就叫咗清甜柚子蜜，小食叫左椒鹽雞軟骨。就由小食開始講起啦。椒鹽軟骨係炸嘅，炸粉唔會太厚，所以咬落去嘅時候非常鬆脆。每一粒面頭都有好多椒鹽同埋炸蒜頭，夾埋一齊食，又有雞軟骨嘅爽脆，又有椒鹽嘅鹹香，味道不錯，而且份量都算多。講到飲品，柚子蜜唔會過甜，有淡淡既柚子香味。最後當然唔少得嘅就係主菜啦。 不過由於我唔係好鍾意食麵，所以轉咗做米粉，而且叫咗魚皮餃，豬紅，支竹，肥牛，金菇，龍蝦丸，仲有黑椒牛丸做餸，揀咗辣汁做湯底。每個餸大概有三至四粒/棵。本身配咗少少生菜同埋蔥。賣相睇嚟好豐富。咁多款餸入面最好食嘅就係豬紅，又滑又香，食嘅時候，令我想起以前細個喺大排檔食嗰啲豬紅。米粉份量非常之多。成碗車仔麵嚟講， 不過不失，分量頗多，味道不錯。整體而言，以蘭桂坊呢區食肆嘅價錢嚟講，價錢非常合理，而且食得好飽肚，如果大家想懷緬下細個嘅時候食車仔麵嘅回憶不妨嚟蘭桂坊車仔麵試下啦！