小甜谷 Dessert Kaffee (已結業)

今日同女朋友行完銅鑼灣，經過呢間小甜谷，女朋友話想入去試試。入到鋪頭，鋪頭嘅裝修好英倫風，而且都貼左好多藝人嘅相片，女朋友話呢間鋪頭係由一個藝人打理。日本廣東炸蠔番茄蟹肉意大利粉：炸蠔有兩隻，同女朋友啱啱好一人一隻，隻炸蠔都算大隻，咬落去好鬆軟，仲有啲蠔汁，而且佢出面唔係一大舊粉團。而佢個麵軟硬程度啱啱好，而我最鍾意就係佢啲番茄汁，佢啲番茄汁係用新鮮蕃茄唔係用番茄醬。胡椒蜜糖豬仔骨厚薯條（半份）：佢啲薯條係即叫即炸嘅，好香脆而且唔會太油。我同女朋友叫咗半份，一共有四件豬仔骨，佢有少少黑胡椒同蜜糖黐住件豬仔骨，甜甜地辣辣地，而且佢啲肉好林，好軟熟，啲肉好容易咬落嚟。鮮榨神奇西瓜：哈哈，呢個西瓜汁，成個小型西瓜上枱，可以除咗飲西瓜汁之外，仲可以用匙羹刮啲西瓜肉出嚟食。焙茶心太軟：抹茶心太軟就食得多，但係焙茶心太軟就第一次食，切開心太軟，佢呢醬就咇晒出嚟，佢啲醬有一種烘焙過嘅味道，燶燶地好容易入口。食飽晒先見到佢有一個創意窩夫pizza，雖然有啲可惜，但係當俾個藉口自己，下次再嚟一於試埋佢！