南小館 (愉景新城) (已結業)

今日下午同朋友嚟左荃灣聚一聚，走果陣差不多5點幾，又到左接近晚餐時間，咁就趁冇乜人去愉景新城搵野食，嚟左呢間坐得舒舒服服既南小館食野。首先有個幾開胃既前菜，少少辣好野味，花生又夠脆口唔會有陣油益味。我地點左個二人套餐，價值$298。《小籠包》上枱既時候仲係熱辣辣，湯汁豐富，皮既厚度都算適中，唔會太厚太硬，亦唔會太簿太易穿，食到肉既鮮味之餘，外皮亦唔會失去存在感。《肴肉》平時上枱都係四四方方既柱體咁，好少見過一片片簿片咁，感覺相對較簿同夾起嚟比較容易散，不過味道口感都尚算合格既。《陳醋青瓜海蜇》爽口彈牙，酸中帶辣，好清爽開胃。《清炒河蝦仁》，蝦鮮甜爽口，配上陳醋食更有層次。《賽螃蟹》，蛋白唔會炒得過老，配上蟹籽更為驚喜。《腐皮菠菜》，菠菜唔會過老，蒜子亦好味道。整個套餐都算不錯，唯一缺點就係無飯麵一項，我地就加左個《蔥油拌麵》，蔥既味道十分濃郁，真係超級香，仲有啲蝦米，非常香口。仲加多個《銀絲卷》，不過就相對平平無奇。