極品煮意 鷄煲.烤魚.火煱 (已結業)

好耐好耐冇黎過葵芳行了，係葵涌廣場同新都會行左接近一個下午，係時候坐底醫肚了。係地鋪一個招牌帶左我地上到黎二樓。同其他放題類既食店一樣，不同時間離座，收費會有唔同。但係估唔到，我地六點鐘入座，但已經有不少枱客食飽走人。佢既煲類主要係分雞煲、烤魚煱同湯煱。其實本來我地係比烤魚吸引左上黎，但係最後都係叫左秘制極品鷄煲，辣度係小辣。今晚既人手明顯唔多，但係店員服務殷勤。過左一陣，鷄煲就黎到了。出奇地鷄件既份量蠻多，我地兩個女仔驚食唔曬。雞煲小辣既辣味不太明顯，而且後期加湯會把辣味沖淡，我建議可以選較高既辣度。配料方面都較為大路，不過款式都幾多，雖然我冇仔細去數，但都有兩個配料櫃，蜆、豬紅、芋絲、韓國年糕等都有得選擇。而粉麵類就有烏冬、公仔面等，因為我本來對粉麵飯冇乜興趣，所以就直接跳過左。最特別係有一個熟食區，我就偏小朋友口味好煎雞翼同薯餅，雞翼同薯餅脆口，唔會有擺涼既問題。甜品有西米露同綠豆沙，兩個都係低糖的，同埋有涼粉、啫喱。飲品區有一個專放可口可樂產品既櫃，其餘都有啤酒櫃同其他飲料櫃。本來對百餘塊既放題期望都不大，但係係呢度都幾喜出望外，食物選擇多，服務都唔錯。