入麵 (已結業)

開完夜，同friend子去荃灣覓食。一初見到「入麵」兩字，就已經畀佢吸引住。一入到去，老闆就推介我地試佢嘅特飲。天氣有啲凍。所以我同朋友2人飲一杯凍飲 --藍玫瑰。成杯唔太凍，不過如果少落啲冰就更加好。我就點左佢地嘅牛魔王麪，因為我一向幾鍾意食牛。結果冇令我失望，牛肉配豬肉湯底竟然出奇地夾。天氣凍嘅情況下，飲多兩啖湯暖暖身子都唔錯。我個friend因為鍾意餃子，所以就叫左一份「阿姨餃子」。佢覺得冬菇餃子最正。之後，我又叫左1份炸雞。雖然份量唔係咁多，但都已經夠哂回味，因為啲雞完全冇咩炸粉包圍，我食到啖啖雞肉香。最後，我同friend子share左1份甜品 -- 雪之布朗尼。見到個樣嘅時候已經覺得好驚喜，之後再食埋個榴槤雪糕簡直覺得一流。我個friend平時唔食榴槤，不過佢都覺得唔錯。