拉麵台風

營業中

休息中

打風都心心念念想食嘅拉麵，除咗「台風」，我諗唔到第二間！呢間荃灣名店嘅人氣相信唔使多介紹，每次經過都見到門口條人龍長到轉彎。今次學精咗，特登揀平日夜晚8點後先去，好好彩佢哋最近翻新完，座位多咗，空間感大咗，我哋好快就安排到入座，唔使點等！我哋一行二人，男朋友毫不猶豫就嗌咗佢哋嘅皇牌 *魚介豚骨拉麵特盛*。碗麵一上枱真係嚇親，塊叉燒真係超巨型，大到遮住半個碗！本身諗住夾起影張呃like相，點知佢肉質實在太稔滑，筷子一夾就應聲斷開，完全係入口即溶嘅級數，油脂甘香，瘦肉部份都好軟腍。湯底濃郁，充滿魚介鮮味同豚骨厚重感，但又唔會死鹹，飲完唔會口渴。麵條硬度適中，掛湯力強，每一啖都係享受。我就試咗個 *骨膠原撈麵*，叉燒係切成一粒粒，撈埋惹味醬汁食好過癮。最欣賞嘅係佢哋嘅客製化服務，配料可以自由轉換。好似我唔食筍，就可以免費轉做溏心蛋。隻蛋煮得啱啱好，蛋黃呈誘人嘅橙黃色膏狀，好滿足！😋 曾經都掙扎過想轉做嗰塊大叉燒，但實在太誇張，怕食唔晒，下次有機會再挑戰！總括嚟講，食物質素、服務同環境都冇得彈，難怪係區內人氣王。如果你係拉麵控，又喺荃灣附近，呢間絕對值得你排隊一試，絕對會再encore！