廣成冰室

營業中

休息中

呢間名震上水嘅冰室，門口周不時大排長龍，少D耐性都唔得掂。對小弟嚟講，呢度更屬不毛之地，冇乜特別事情都唔會入嚟。今次趁太座要開會，偷時間走去幫襯...星期天，又係一堆人企响門外。好彩一個人，易"埗位"，即刻就有位...之前去咗陳六記食燒腩，飽咗六七成，只叫菠籮油及招牌紅豆冰。見個個都係食茶餐，有方包有奄列有牛肉通，但胃納有限，而且餐飲又唔可以加錢轉豆冰，於是只散叫...菠蘿油先嚟。用嘅雖然係來貨，已凍冰冰，包又唔太軟熟，但皮卻頗鬆脆。可以想像到熱食時應該不俗...食完半個，等豆冰送嚟。一等就等成半粒鐘....不耐煩，但人多冇辦法。要出番去接太太，等唔切，埋單走人...踏出門之際，回頭只見朝思暮想嘅豆冰出現於眼前...唉....緣慳一面...唔忿氣。隔咗兩日又再抽空入去...去到大約二點半，人龍消失，可以慢慢嘆。豆冰即叫即有....今次可以叫埋牛肉通....豆冰絕對係傳统製法，大條尖尖嘅冰柱，邊食邊用匙羹弄碎D冰，拾回兒時感覺；紅豆大粒之餘亦煲至起沙；糖水奶味重，甜度亦剛好...牛肉通亦係各食客熱門之選。牛肉極新鮮，灼至剛熟，絕冇用梳打粉招呼。望住湯入面嘅沉澱物，忽然想起深水埗維記嘅豬潤