抹茶館 (已結業)

抹茶館近排喺香港慢慢興起，以家出名嘅程度都算勁，作為潮人嘅小編緊係要去朝聖一下！小編今次去食嘅係旺角雅蘭中心嘅分店，上到2樓其實一望就知抹茶館喺邊，因為實在太多人排隊！雖然比起高峰時期差好多，但係最後都等左30分鐘嘅。喺等嘅期間小編同朋友借左本Menu黎睇，諗定想食乜嘢，見到menu上面嘅圖片確實真係幾吸引，令到食慾大增！終於到小編嘅時候，禮貌嘅服務員帶左我地去左2人位，係一個幾好坐嘅環境，雖然同隔離台都幾痴埋，但係都可以接受嘅。 好快地，我地已經嗌嘢食，最後我地嗌左：滑蛋鰻魚丼、滑蛋蝦天婦羅丼、忌廉牛奶抹茶、牛奶抹茶。先講下滑蛋鰻魚丼，其實一上到台嘅時候，小編瞬間唔想食！ 因為小編唔太中意生嘅菜，亦唔中意番茄，同奇奇怪怪嘅醬，但係個飯就有齊呢啲嘢！ 但係其實撇開呢啲嘅話個飯係幾好食嘅！ 但係有頭先上面所講嘅個堆嘢已經扣晒分！至於滑蛋蝦天婦羅丼就冇小編憎嘅個堆嘢，而且其實幾好食！蝦質地好食，唔會話好多粉，呢個係好加分嘅一點。至於飲品方面其實係幾失望，因為小編知道抹茶一定苦，所以小編揀左忌廉牛奶抹茶，諗住可以甜啲，點知仲苦過酒樓啲茶！真係太苦啦！