丸和食堂 (已結業)

喺上水發現到呢間新開日本嘢，本住人馬座嘅冒險精神，當然要一試究竟。晚餐時間入到去竟然坐無虛席，然後職員就帶左我地上樓上雅座。男朋友話佢今日好飽，可能嬲我琴日掉低佢自己去食好晒，所以飽到今日掛。所以我都唔敢啦得太多，飯都只係嗌一個兩份share。嗌左個最簡單嘅三文魚蟹子飯，佢啲蟹子真係好多，撈混啲飯啖啖都脆卜卜。而啲三文魚都係厚切同大大塊，夠新鮮👍🏼另外仲叫左個芝士軟彀蟹卷，佢做到細細粒，一啖一粒，岩晒斯文嘅女孩子有儀態地食。佢個軟彀蟹炸完脆到好似食薯片咁，合晒鐘意食香口嘢嘅男朋友河車。講起香口嘢仲嗌左個炸魷魚鬚，佢啲魷魚都好大條嘅，炸到脆卜卜，男朋友好鐘意食，不過如果可以唔好炸到咁深色就好啦！最後仲有個蔬果三盛，係燒茄子同脆肉瓜，加埋個炸紫芋波波，我好鐘意食呢個炸波波，外脆內軟，甜甜地，我當甜品食🤣而佢個燒茄子同脆瓜加左燒汁都清清地甜甜地，唔錯。