小松鼠 (恒勝樓) (已結業)

次次嚟九龍城都係食泰菜或者打邊爐，今次就幫襯下呢間嚟自元朗嘅小店。餐廳招牌菜係手打安格斯漢堡，除咗牛之外，漢堡都有豬、雞、魚、蝦揀，另外仲有多款意粉同pizza，選擇好多。一行三人叫咗一個二人餐，另加一個意粉。二人餐$178 包括兩個餐湯、蒜蓉包、一個小食、一個意粉同埋一個漢堡。餐湯點咗羅宋湯磨菇湯各一，羅宋湯睇顏色都知唔係罐頭開水嘅，飲落微酸帶少少辣。磨菇湯菇味濃郁好creamy，飲得出磨菇成份佔好多，好足料，好好味。估唔到餐湯都有驚喜二人餐小食揀咗黑松露薯條，新鮮炸起非常脆而且份量足，黑松露醬就唔算多。手打安格斯牛肉漢堡有跟薯條同沙律，配菜嚟講沙律同薯條嘅份量都幾多。漢堡包嘅麵包好鬆軟，配料有芝士、蕃茄同生菜，牛肉唔算大塊，但勝在牛肉味濃，食落夠腍咬開有肉汁！香煎帶子配墨汁扁意粉估唔到水準咁高，意粉煮得剛好軟硬適中仲有咬口，墨汁掛哂上意粉而且鮮甜。另外點咗一個手打牛肉漢堡配西西里意粉加煎蛋，西西里意粉即係茄汁意粉，上面放牛肉漢堡同煎蛋好有日本洋食feel。牛肉漢堡煎到表面少少燶食落好香口。跟餐仲包括飲品，以人均消費$100嚟講質素真係高，係值得幫襯嘅良心小店。