大街餐廳由Coca-Cola®呈獻

營業中

休息中

由於今日係本人嘅農曆生日，所以我們一家去咗迪士尼樂園玩，喺下午嗰陣我們玩到有啲啲累，所以去咗「大街餐廳」食下午茶休息一下！我們叫咗個Duffy & Friends春日下午茶，用嚟盛載著食物嘅美食架係幾層高，賣相相當精緻吸引，首先我們食咗芒果龍蝦肉沙律筒拼迪士尼小熊芝士蛋糕嘅沙律筒係用個迷你雪糕筒載著香甜清新嘅芒果龍蝦肉沙律，而芝士蛋糕嘅質感相當軟滑，味道非常濃郁，而且有一對趣緻可愛嘅Duffy同Shelliemay嘅白朱古力牌！牛柳串燒配香蒜蜜糖汁嘅肉質非常鬆軟嫩滑，再配埋惹味嘅醬汁一齊食，真係好正呀！即烘米奇鬆餅焗得外層相當金黃香脆，入面就好鬆軟，牛油味非常香濃，而且鬆餅係一個隱形米奇嘅造型，真係好得意呀！馬卡龍嘅表面印咗可愛嘅Duffy公仔圖案，令人有種唔係好捨得食嘅感覺！菠菜芝士三文魚撻同蕃茄芝士撻嘅撻皮焗得相當鬆脆，菠菜芝士三文魚食落味道都幾芳香，但感覺有啲啲膩，而蕃茄芝士就比較清新！飲品春日小態特飲「石榴汁」嘅味道好清甜！大街小熊春日紀念杯配士多啤梨蛋糕嘅士多啤梨相當香甜新鮮，蛋糕就好香滑鬆軟，最好嘅就係用嚟盛載著嘅紀念杯係可以攞走㗎！