金源至尊炸醬麵 (已搬遷) 新店位置

文公子一向係炸醬麵Fans，土瓜灣七喜同已結業的九龍居，都曾經非常有水準。上兩個星期見客經過傲雲峯，見到有間店標榜做至尊炸醬麵，睇到文公子幾有興趣一試，不過因為要見客而擺低咗，今日終於有機會。叫得至尊，當然要睇睇咩料，一於整個至尊炸醬撈幼麵。一入口，炸醬用的豬肉頗肥，有好大部分的肉條係全脂肉，唔膽固醇超標都一定血脂爆錶...揀哂出來嘅炸醬已經所剩無幾。個肉質，似乎係豬頸肉位置，味道帶酸，總比坊間死甜的有好感，不過辣味的確唔多夠，喚唔起七喜或九龍居的回憶味道，店家仲有膽落隻辣椒在餐牌，真係有些小落差咯。麵條應該追求QQ咬口，未曾煮透，而份量亦唔算多，似乎無兩個麵餅?食完仲肚餓嘅撈麵，都真係幾少見。個湯似乎有落大地魚，不過食到好大陣胡椒粉味。叫了杯凍奶茶，飲得出個茶味，不過似乎相當濃，飲到尾苦到唔想飲驚削胃。埋單盛惠$49，抵唔抵就見仁見智啦，不過叫至尊，就一定講唔上了。