十兄弟車仔麵 (已結業)

糧尾依然要好好享受假日, 訓到自然醒, 同朋友外出食個lunch。與素食朋友同行, 要搵一間又平又有野岩佢食嘅其實唔係咁易。經過見到間車仔麵, 門外望望menu, 竟然有素食車仔麵, 無需再多行, 就入去食個車仔麵醫肚。店內唔算大, 但地方企理。自行scan QR code落單, 多款食材、粉麵自由配搭, 亦有幾款已定好嘅精選車仔麵, 少量小食同埋飲品供應。我就揀咗自選組合嘅車仔麵,揀咗四款配料+油麵+腩汁+小辣+多蔥清湯上加腩汁, 色澤同湯底味道唔會過濃, 辣油放於湯匙上, 比客人自行加入, 辣油好夠辣, 加入湯底幾惹味。油麵軟硬剛好, 蠔皇紅燒鮑魚爽彈唔硬, 食到鮑魚本身嘅鮮香; 鹵水豬大腸好夠林; 香辣玻璃魷魚好爽, 不過浸落湯底後唔覺辣, 口感爽; 香辣豬紅彈滑。素食朋友揀嘅係---靚靚全素麵好少車仔麵有全素麵, 通常都係自己組合, 呢度竟然照顧埋素食朋友, 真要俾個like佢呀。同樣揀咗油麵, 全素麵包含了金菇、豆卜、炸支竹、清甜蘿蔔, 支竹滑溜,  金菇、豆卜吸咗d湯汁, 蘿蔔清甜, 清清地又健康。車仔麵可+$6追加杯裝甜豆漿,豆漿甜甜地又有豆香, 甜度可平衡到食辣嘅味覺。