新桂香燒臘

營業中

休息中

朋友極力推介呢間喺柴灣嘅新桂香燒臘嘅叉燒，所以今日大雨過後趁有機會就過來碰一碰運氣，因為朋友話呢度成日都大排長龍，一出爐之後就好快賣晒。可能因為之前落大雨，所以竟然我哋去到嘅時候完全冇人排隊，而且仲有叉燒買。見到佢都仲有好幾條幾靚嘅叉燒掛咗喺度，所以即刻二話不說就叫佢揀條靚嘅半肥瘦窿邊叉燒， $200一斤叉燒，如果好味嘅話，呢個價錢都唔算貴。忍到返屋企終於可以試吓啦。睇落去真係好多肥膏…但係一咬落去， 就係呢啲肥膏先至最好味。肥而不膩，成舊叉燒都好鬆軟。另外我記得係Ritz Carlton嘅中菜館食過佢哋嘅招牌叉燒，都係半肥瘦肉質又非常鬆軟嘅。相比之下，新桂香嘅叉燒有咁嘅質素，呢個價錢一啲都唔貴。蜜汁係名副其實嘅蜜糖，有蜜糖嘅texture同濃郁嘅蜜糖香味。朋友推介完之後我都會推介俾朋友食。