鐵板神燒

農曆年後有次去粉嶺行山，當晚試咗位於聯和墟嘅鐵板神燒，果陣時疫情開始嚴重，印象最深刻就係成間店靜得可憐😂，同埋有好多準備分發畀街坊嘅漂白水。

店入面有部自動售賣機，揀完食物，畀完錢，就坐定定等食。我哋兩個都揀咗鐵板野牛丼，首先上枱嘅係炒雜菜，主要係椰菜同芽菜，非常大碟，炒得唔算油膩，亦都冇落好多調味，清清地，幾好食。跟住就係個牛丼，牛嘅底下鋪滿蔥粒，正中間有一隻生蛋黃，食嘅時候將所有食材撈勻，感覺冇咁熱氣，亦都食到炒牛肉嘅香味。

呢餐屬正常味道，無甚驚喜，不過八十蚊就有得食鐵板燒，仲食到你飽一飽，其實係抵嘅，實在不能要求更多吧😂。