太興 (八號花園)

營業中

休息中

熱奶茶，首次係太興飲熱，唔飲招牌冰鎮凍奶茶，天氣咁鬼凍！茶味依舊香濃，茶香係脷尖上留有餘韻，久久不散。落包半砂糖更加吊起甜味。Body 質感非常幼滑，慢慢㗳、慢慢嘆，好好飲！燒肉切雞飯，簡單是美，今餐難得平淡，食個普通雙併。都係首次無 order 雞髀，只係 normal 咁叫，睇睇師傅會否醒隻雞髀我先。萬眾期待黎到喇！Check check，只不過係雞胸近雞背部位，無咩肉食，唉。係咪董事局落左 order，normal 唔出得髀呢？依啲咪大集團囉。試試先，雞肉味濃，就算胸肉都幾棉滑，滿意，好味﹗燒肉肥瘦適中，咬落勁嫩 juicy，咸香徘徊整個空間，每一啖都充滿肉汁，而且燒肉皮仍然微脆。撈上清香燒味豉油，搭上燒肉雞肉同白飯，梗好味啦！咸魚雞粒炒飯，最討厭炒飯有菜絲，早知唔理有無都叫走左去啦，落菜炒搞到飯粒特別濕囉。雖然賣相唔多討好，望落好油、有點炒過火、燶燶地咁。不過一試之下味道好好噃，炒得香口有鑊氣，而且飯粒嚥韌飽滿不太油，最衰加左菜啫，料就比較少，唔多食到咸魚同雞粒。真係人不可以貌相，過關，合格。