得龍大飯店 (已搬遷) 新店位置

又係好耐冇嚟la...屈指一算都有成年多嘞...今夜跟太座一家飯聚，見好耐冇嚟，又好掛住個太爺雞，就返嚟跟"老友們"聚吓舊...其中一個"老友記"當然係太爺雞la...雞仍舊好滑，未食落口已嗅到嗰種獨有嘅煙燻味，醮上用蒜茸及葱頭製成嘅醬料，食到唔停得口。得獎名菜果然名不虛傳。外父外母讚口不絕...當然唔少得金錢雞。依舊甘香豐腴，蜜味濃厚；雞肝及冰肉以上加上一小片薑，減低油膩感，食多幾嚿，越食越精神另一"老友記" 砵酒桶蠔水準依舊--- 蠔經走油後再加酒燜焗，入哂味之餘表皮亦微脆，極出色；墊底嘅洋葱頭又係入晒味，跟蠔一樣可口....金蒜糯米蝦相對就較普通。糯米太濕，蝦亦不算好新鮮，不過勝在糯米食落口好鮮味，不知不覺嗶完一碗又一碗...鮑汁柚皮炆鵝掌亦不過不失，柚皮唔苦，不過唔夠淰...跟眾"老友記"重聚，不亦樂乎...下次再嚟要同黑豚义燒等"新朋友"認識吓先...