呢間冰室大走懷舊路線，以復興舊冰室面貌為名而成。一走入去，又真係有幾分懷味道，舊水壼、收音機、個電視仲一直播放七八十年代既影片，感覺又真係唔錯。
不過望多兩眼，就發現唔少可以做得更細緻既地方，例如個「16比9」電視就可以配番個舊式既電視框，既然要走懷舊路線，呢啲野可以做得更徹底。
不過講到尾一間餐廳最重要都係野食，就點佢一個懷舊餐試下味道。
其實個餐都唔係好懷舊，而家好多冰室同茶餐廳既特餐都仲有得食，不過佢要強加「懷舊」二字都由得佢。先黎個沙嗲牛意粉，失敗了，啲牛肉凍既，雖然大家都知意粉同牛肉都係預先整定，但係都唔好凍冰冰丫，烚烚佢都好呀。
再黎係多士炒蛋，炒蛋都係咁上下，但係個多士就‧‧‧第一口咬落去，個多士皮硬既，雖然入面係幾軟熟，但係個皮都唔好咁硬丫。
最後係餐飲咖啡，杯咖啡岩岩上枱既感覺好奇異，因為有好多泡....總之就係唔好既感覺啦...
呢度用既係方糖，俾人一種懷舊感覺，但係都多左一樣唔方便，就係啲糖攪好耐都攪唔溶，終於攪溶晒喇，杯咖啡都已經唔係好熱，一啖落口，有酸酸的味道，自問落糖既份量一向好準，所以杯咖啡...
食到呢度，撞正lunch hour，人越黎越多，都係快手埋單走人，盛惠$36，哈，呢度門面好懷舊，但係價錢就一啲都唔懷舊，仲要貴過出面。
黎得呢間冰室，都係重懷舊多過重味食架喇，不過現時香港唔少地方都仲有冰室，真正開業幾十年既冰室，如果真係想感受當年冰室既氣氛味道，就趁呢啲冰室未執既時候快啲去喇。
