金饍韓國料理 (已結業)

北京道一號有一間韓國餐廳可以飽覽維港海景同埋全球最大型燈光音樂匯演「幻彩詠香江」。呢度可以邊嘆美味韓燒邊欣賞維港兩岸景色，真係人生嘅享受！我地點左二人一個對燒套餐，加$25就可以任飲啤酒、汽水同埋一系列特色飲品。除左汽水外有唔少低糖或無糖飲品選擇，岩哂注重健康嘅都市人！韓式開胃前菜有麻油椰菜、菜心、泡菜及青瓜等。芥末沙律(其實冇咩芥末味，而係味道酸酸地嘅柚子醋汁)烤五花腩肉，豬肉肥瘦雲均勻，充滿油花，燒熟後帶輕微焦香。另外有牛肉及蜜味雞胸配清新爽脆生菜。牛肉及雞胸都已調過味，醬汁味道濃郁，再包埋生菜一齊食可減低油膩感。雞肉味道香香甜甜，質感幾嫩而且份量好多！大大隻虎蝦以蒜蓉及香蔥調味，口感爽彈牙。好中意佢嘅海鮮煎餅煎得外脆內軟，香味十足，而且佈滿海鮮餡料，鮮味濃郁好味道。最後食埋個曲奇味雪糕，完美作結。以咁合理嘅價錢可以以咁靚嘅夜景伴晚餐，都算抵食！