滿屋廚房 (已結業)

食過鑽石山分店，感覺不錯，食物水準正常，價錢相宜。同朋友係黃埔簡簡單單食個lunch，朋友想食海南雞飯，就揀左full house。黃埔店係自助形式，先行入座，揀好食物再出去購買。想讚一讚店舖嘅餐牌設計，簡潔易睇，食物相吸引。有飯腳嘅好處就係可以試多啲小食。炸薯條($28)看似同東南亞野食格格不入，但我地突然口痕想食，亦都好彩有叫到呢個意外驚喜。新鮮炸起嘅薯條熱辣辣，食唔停口。大大份，再點上蛋黃醬，即刻想黎一杯啤酒。東南亞風味拼盤($58)，有蔗蝦、魚餅同金絲蝦卷，各三件，都幾抵食。魚餅重香茅味，點上泰式辣醬十分惹味。金絲蝦卷香脆可口，大人小朋友都中意食。蔗蝦相對比下去，蝦肉未夠彈牙，若更新鮮會更好。朋友點嘅海南雞飯($68)，比想像中好味，雞肉嫩滑，點上薑蓉、醬汁，再配上黃油飯，又幾惹味。黃油飯略為鬆散，但無損味道。我點左鮮茄焗厚切豬扒飯($72)，賣相同某連鎖快餐店十分相似，個人更加喜歡呢個味道。鋪面嘅芝士，同蕃茄醬配搭恰到好處，帶出香味又唔怕飽滯。蕃醬味相對清新，無咁膏狀，撈埋炒飯底食特別惹味。厚切豬扒的確大大塊，味道不俗。呢個價錢係黃埔區食到呢個質素嘅東南亞食品，都幾合理抵食。