稻乙日本料理

營業中

休息中

生意進行得幾順利，今日就食得好啲慶祝下。男朋友一早book定枱，餐廳環境舒適，一路播住日本音樂感覺十足去咗日本。首先就食一個前菜，外邊少見嘅鮟鱇魚肝。魚肝入口即溶，齒頰留香。飲一啖啤酒清一清個口，再食真蠔刺身。生蠔放咗日本醬汁，令到生蠔鮮味更加突出，裙邊夠脆，正！之後就係薄切蜜鉗鯛刺身。用上深淺色相間嘅碟，透過刺身亦清晰可見，師傅刀工唔錯。刺身配酸汁，令魚肉清甜不腥。燒物方面我哋揀咗雞翼同黑松露燒帶子。雞翼不過不失，黑松露燒帶子未食已經聞到非常之香！加咗上湯同黑松露燒嘅帶子，鮮甜而且層次豐富。重點貝殼上邊嘅湯，保留所有帶子嘅鮮甜味，精華所在。清酒煮大蜆，清酒份量唔會太搶，味道恰到好處。大蜆厚肉新鮮，出色。到最後食返個魚湯稻庭烏冬，乳白色嘅湯汁非常吸引。先飲一啖湯，魚香十足，味道好似自家魚湯咁實在！烏冬煮得時間剛剛好，夠煙靭。總括嚟講呢間餐廳嘅日本料理水準唔錯，材料新鮮，味道正宗，有機會會再嚟試其他時令菜式。