岩手 ·建 (已結業)

今晚阿女話放工帶我去食好野，我地相約左係上環港鐵站等候，出左地鐵行左大約5分鐘，再踏上一條好陡峭嘅樓梯，就見倒岩手.建，食店門面和風味非常重，好楊眼。入門口左手邊有張三人bar枱，面向bar枱有塊大大壁報板，寫上當日新鮮食材。店內乾淨整潔，餐桌上擺位亦整齊企理，伴著柔柔日本和風音樂，另繁忙左工作一日嘅我感到好放鬆😃。阿女order左幾款壽司🍣 秋刀魚，真鯛，赤身，白蝦，三文魚，赤鯥、沙甸魚、平目.... 壽司嘅魚生非常新鮮，尤其真鯛同赤身最鮮甜肥美；而最值得讚係壽司飯同醋嘅比例調教得非常好；壽司飯微微暖，軟硬適中，粒粒分明；師傅握壽司亦做得非常好，不論用手或用筷子夾起都唔會散開；壽司入口之後，米飯立即散開係口腔滾動🤗，非常完美。壽喜燒 - 湯底味道香醇，鹹甜度恰到好處；牛肉翻兩翻夾起，蘸埋蛋黃汁一齊食，牛肉入口即溶，加埋蛋香，簡直完美配合。