The Mafe Cafe (已結業)

平時自己都好少會上去樓上嘅咖啡店，始終係比以前一啲質素麻麻嘅咖啡店嚇親，所以好少會再幫襯。今日去旺角，想同朋友聚一聚，佢話附近有間新開業嘅樓上咖啡室，可以試吓，咁我都無謂托手踭。入到去咖啡室，裝修都係走型格風，勝在地方闊落，環境幾舒適，適合同朋友相聚傾吓計，一改我對樓上咖啡室十分狹窄嘈吵嘅印象。店員好快都將餐牌遞上，服務都幾親切。btw, 呢度嘅餐牌同樓上嘅孖啡cafe係一樣。首先，我叫左一個黑椒燒牛肉牛角包，好快就已經嚟到。牛角包都好香脆，牛油味香濃，燒牛肉都不過不失，至少冇韌都咬唔開嘅筋，pass!之後點左一杯blueberry yogurt, 都ok架，唔會太甜，飲落係自然嘅水果香甜味，冇落糖水。上面仲有我最鍾意食嘅忌廉，好想瘋狂encore d cream!最後仲叫咗一個心太軟，都幾好食，外層都幾香脆，裏面當然好流心啦，無失望呀。