快樂蜂 (國都大廈)

營業中

休息中

一向喜歡食炸雞嘅我，一早對Jolibee有所聽聞，之前只係得中環一間分店，無乜機會食。但近年港九地區開多咗分店，連早前菲律賓總統訪港都要專程去食，已經令到我好想試。咁岩尋日見到Yahoo有團購，雖然搶唔到"一蚊雞"，但見兩個餐都只係需要40蚊相當抵食，當然二話不說就買啦。適逢今個星期Sogo大減價，掃完貨就順路去尖沙咀分店，可能係團購關係，平日都幾多人，要等咗陣先有位。餐牌簡單一目了然，我地一行兩人除咗團購兩個餐外，亦加咗一份5件脆雞柳及一個香芒蜜桃批。食物好快就到，炸雞外皮香脆，炸粉唔會太厚，雞肉依然保持嫩滑多汁，配埋特製肉汁食更加惹味。脆雞柳雖然係用雞胸肉，但肉質唔鞋，啖啖肉好味道。而香芒蜜桃批味道特別，食完油膩炸雞後食返d甜食感覺清新。埋單每人都只係40蚊左右，非常抵食，如果聽日可以搶到一蚊雞就更好了。