綠林甜品

話說成班人食完晚飯，咁梗係行去深水埗食埋嗰糖水啦！我地㨂咗去綠林甜品，夜晚8點幾，出面勁多人排隊。我地6個人等咗30分鐘到，先至有得食。不過冇計啦，裡面唔多大枱，通常去食都係2-4個人去食，所以一大班人就要等耐啲啦。環境都可以嫁好乾淨，好熱鬧，啲侍應服務都唔錯！不過食中式甜品，唔會食環境同服務，最緊要好味！

朋友同我share咗個什果大明珠同埋豆腐布甸，其他人叫咗馬蹄露，芒果班戟，仲有芒果布甸。

先講下什果大明珠，我地㨂咗配花奶。啲生果好甜，又蜜瓜木瓜哈蜜瓜西瓜芒果，好足料。成個甜品入口涼快，凍冷冷好好味！加埋啲大明珠，口感一流～

什果大明珠

至於嗰豆腐布甸，比我想像中好食好多。不愧係招牌之一！以為豆腐冇咩味，點知配埋跟單嘅紅豆同綠茶雪糕，味道平衡哂。紅豆甜為主，綠茶味又濃，食多啖豆腐布甸，啲味好夾|～絕對值得一試。

1

豆腐布甸（配紅豆&綠茶雪糕）

雖然其他人嘅甜品我冇影到相，不過都試過下味道。我唔多中意嗰馬蹄露，因為好淡，冇咩味。可能我心目中嘅馬蹄露應該係會甜番少少嘅。

另外，嗰芒果班戟完全唔得！層班戟皮冇芒果味，仲要膠膠地嘅口感，除咗芒果肉有芒果味之外，成個好似係cream加膠～

咁當然都仲有好嘅代表嘅。依間甜品鋪整布甸果然有一手。無論係整豆腐味定芒果布甸，味道都好濃，甜度都適中！絕對推介！