三小姐海鮮小菜

男友家庭晚飯, 伯母話之前食過三小姐覺得幾好味, 故不作他選.

男女說以前都會先訂位, 但現今市況應該walk in都有檯, 七點鐘去到果然大把吉位, 其他檔口亦如是.

人未齊, 坐到七點半先點菜, 只需十分鐘六個菜全部上齊, 好在五分鐘後人到齊, 否則菜涼了就不好吃.

醬燒骨保持水準, 喜歡半肥瘦炆肉的必食, 豉椒炒蜆及炒蟶子份量比以前畧多了, 芡汁卻過杰, 切雞用鮮雞仍鮮味十足, 籠仔糯米蒸膏蟹 - 蟹膏豐盈, 糯米飯稍稍濕了但未至於爛飯, 金銀蛋菠菜合格, 後加兩個餸 - 豉椒鵝腸爽口而不肥膩, 陳川粉頗多開邊蝦, 用蒜泥齊蒸令粉皮入味, 所有熱菜都沒有令人失望. 吃飯其間啤酒推廣員相當落力推銷及不停為我們添酒, 但埋檯太頻密有點overdone的感覺.

埋單$538, 市況欠佳卻免除排隊之苦, 何妨多來幾次.