餃子園

營業中

休息中

今日有啲事去咗中環荷李活道嗰度行街，落返山嘅時候有啲餓，就去左搵嘢食啦。行過依間餃子店，想起好似好耐冇食過，就不如食返幾隻餃子先行。去嘅時候可能只係下午茶時間，人唔係好多，但店不大，一個人都要搭檯。一個人都唔食得太多，就嚟咗一份餃子，同埋一份山東燒雞。餃子係要左就要左最普通嘅鮮肉白菜餃。首先黎係山東燒雞，大家都知道山東燒雞係好似手撕雞咁，再加埋蔥蒜，個汁鹹鹹地酸酸地嘅。一份都幾多，當然佢哋價錢都唔平啦。雞肉嘅質感就稍為老左少少，實左少少，可能雪得耐左同當然唔係新鮮雞啦。餃子要左最正宗的冇湯就咁水煮。正宗北方餃子，係冇湯跟嘅。個人就比較怪，偏偏鍾意食依種皮比較厚比較實在嘅餃子。依間鋪頭嘅餃子係自家製嘅，所以都係新鮮包，餡料係新鮮，不過調味就稍為清淡少少，都唔錯，點埋醋食就最好啦。食飽飽，就繼續行程喇。