和越式牛肉粉餐廳 (已結業)

估唔到個食評未寫，佢已經話摺咗！依家只係補寫番，當留個記錄啦。話說好耐之前，老婆同事話寶勒巷好多嘢食，所以星期六晏晝走過哩打個轉。平時搵食好少揀越南菜，一年都係三幾次，唔係話唔鍾意，不過少食少見識，印象唔深，凈係諗起扎肉呀，檬粉呀，蝦餅呀之類，晌度遇到和越式，因為見門口貼咗D得獎介紹，所以一於揀佢哩試吓！（雖然攞過雜誌搞嘅飲食獎，終歸都要結業！）已經二點幾，等食下午茶餐，抵丫嘛，每客廿零到三十蚊！要咗個西貢炒飯，烤牛肉撈檬，附送一個油菜、一客絲網春卷，要飲嘢就要加錢，都幾抵！算唔算正宗講唔到，因為自己對食越南嘢真係無乜心得，唔知點為止正宗，但個人而言，炒飯炒得飯粒分明，有D鹹蝦醬味，都幾好食，但無乜餸料，此外就再無其他特別喇；而個撈檬，烤牛肉稍為乾咗D，不過撈埋D甘筍絲、芽菜絲、青瓜絲，加埋魚露，口感幾清爽。反而個絲網春卷印象較深，因為個名特別之餘，個樣又別緻D，唔係平時見慣嘅春卷皮，咬落唔油，餡料就不外乎都係D肉絲菜絲，味道OK！