為食龍 (已結業)

一直都知道呢一間餐廳，一開始喺銅鑼灣開店，但好似係冇堂食所以一直冇試過。佢而家開咗喺中環，所以就放工嚟試下。不過佢嘅地點呢係比較偏嘅，喺 LL tower嗰棟嘢嘅餐廳次次去都好難搵到。餐廳嘅裝修都幾靚嘅，特別係就到聖誕節所以有好多聖誕嘅裝飾。下層好似係廚房only﹐要上上層先係食野。我去嗰日係平日，但都幾多人食。因為個晚比較凍嘅關係，我哋只係試咗三件佢嘅招牌腐皮壽司，腐皮非常之甜嘅，唔洗豉油都好夠味， 但由於腐皮味比較濃，所以覺得反而配帶子/甜蝦等等比較清啲嘅 toppings會比較好，辣味三文魚就有啲撞咗兩樣好濃味嘅嘢一齊咁。既然係凍嘅就嗌咗唔少熱食，吉列蠔有四隻，唔算好大隻，但係即刻整出嚟好熱嘅。鰻魚蛋包飯非常大碟！完全係冇諗過會有咁大條鰻魚嘅，蛋包飯嘅飯亦都有好多，但係佢嘅飯係白飯，冇其他餸一齊炒過嘅，不過配埋鰻魚汁撈飯都好食呀。整體上菜速度都快，而且waiter好唔錯，一開始我問佢有冇暖水，因為嗰日真係好凍但檯上都係得一glass 凍水，佢最初就答我冇，但之後都特登幫我搵咗一壺熱水返嚟， 值得一讚！