韓雅林 (已易手) 新餐廳

o黎過韓雅林好多次﹐但冇次記得寫低。總括o黎講﹐我一去再去都係因為幾個原因:食物唔錯﹑服務親切有禮﹑坐得舒服同埋價錢合理。平時去親﹐貌似陳慧珊o既知客姐姐總係笑容滿面﹐侍應生好幾個都勤快而且有禮﹐經理們似乎亦睇得幾緊。至於食物﹐前菜都唔馬虎﹐主菜人蔘雞湯﹑栗子牛肋骨煲﹑仲有烤牛肉等等都有平均水準﹐係唯一有次食紹菜牛肋骨湯覺得味道麻麻。午飯時間餐後都有送西瓜同飲品/甜品﹐只要雪糕有芝麻味﹐我都忠心不二。題外話﹐今日又o黎食飯﹐撞正無記拍攝飲食節目﹐中間坐o左被稱為「才女名模」阿周小姐﹐雖然遠看﹐但妝真的是濃得可以﹐而不幸地﹐看起來是很老很乾又黯淡﹐就像上次我點的紹菜湯一個顏色... =-p