金鶴拉麵 (九龍城道) (已結業)

身處土瓜灣舊區，竟然有幸得到神級拉麵店的青睞。在舊區中的金鶴拉麵，門面亮麗，份外顯眼。一入去，以為只有寥寥數張吧枱。原來上一層，別有洞天。裝修好有格調，座位非常之闊落，而且好乾淨好企理。整體感覺令人覺得好舒適，心情又份外輕鬆。（酒店式廁所更加令人眼前一亮！）一場來到，當然要幫襯招牌雞白湯拉麵啦！我同朋友仔，一人點左一款雞湯，分別係普通雞湯同特濃雞湯，想食出兩種風味。賣相好靚，未入口已經興奮。一碗拉麵上面，分別有慢煮雞肉同叉燒，非常超值。慢煮雞肉質地好軟好特別；叉燒肥瘦得宜，又香又有咬口。最值得令人留意的，當然係招牌雞白湯啦！普通雞湯已經令人好難忘，又香又濃，真正雞湯有雞味！特濃雞湯有掛麵的效果，濃厚滑溜的雞湯充滿着骨膠原，但出奇地又一啲都唔油膩，食晒成碗面，雞湯已經差不多見底了。除咗拉麵滿分之外，小食整體質素都唔錯，串燒火候控制得好，調味亦出色。原來只要用心，一碗簡單的拉麵都可以做到滿分，與別不同。