3
炭燒笑宴主打沖繩料理，晚市有放題，客人可以揀日式燒肉或火煱，任食A4/A5和牛，沖繩黑豚肉，松葉蟹，野菜等。$488加一任食，淨食和牛都抵番條數，爆肚都抵啦。
一坐低，侍應就端上前菜，和牛沙律，刺身拼盤同半隻松葉蟹。心諗，駛唔駛咁趕，啱啱坐低咋喎，嘢飲都未揀。不過諗深一層，早上菜都啱嘅，限時兩粒鐘，時間緊迫，快啲食完前段，快啲有得燒。
刺身同沙律嘅質素都唔錯，刺身厚切新鮮，和牛沙律味道清爽。
松葉蟹味道鮮甜，蟹肉豐滿，唔腥，份量毫不吝嗇。我一氣過拆哂啲肉，加少許醋，鍾意食蟹嘅你真係要勿失良機。想濃味啲，將啲蟹腳放上爐燒一燒，味道更香濃。
温馨提示一:
如果食哂啲前菜沙律刺身松葉蟹先至燒肉，一來會唔夠時間慢慢燒，二來食太多嘢，戰鬥力下降，番唔到本。記得食到咁上緊就叫侍應上爐燒肉，千祈唔好食哂前段先叫，免得浪費時間。(拆蟹認真需時)
1
溫馨提示二:
水係免費嘅，不過要飲果汁汽水綠茶就要加70蚊任飲，要酒精飲品任飲就要150蚊。我諗過度過，飲得多嘢，食唔到嘢咪棧蝕卓。100蚊就有一杯700ml嘅Suntory啤酒，兩份飲都ok，再唔係叫多杯都係兩舊水，點都抵過每人150蚊任隊。
1
燒肉黎啦，沖繩黑豚肉我唔識睇好壞，不過油脂同肉四比六，唔會太多肥膏，入口爽嫩，冇豬臊味，煎起黎油香四溢，味道甜美。
和牛油花尚算均勻，入口軟嫩亦有牛肉香，調味恰當。餐桌備有雪鹽，有獨特鹹味，更能帶出牛肉嘅鮮。無需加太多醬汁，就可以品嚐到鮮嫩可口嘅燒和牛。
溫馨據提示三:
一碟牛肉大概八片，廚師預先切定，每碟肥瘦有異，所以如果慊某碟太肥，不妨向店員反映，佢哋會盡量換過一碟俾你。
野菜每碟有冬菇，青椒，紅椒，南瓜，洋蔥同日本青椒仔，顏色豐富，用料新鮮。
温馨提示四:
食到後尾開始飽，但係又仲想食青椒仔，唯有叫侍應淨係俾碟青椒仔，其他菜唔要，佢哋都好樂意效勞。
最後我哋兩口子食咗四碟和牛，三碟野菜，兩碟黑豚，再夾埋前段嘅兩碟蟹，兩碟刺身同沙律加杯大啤，兩人共1200蚊，算係番本。可惜小弟堅唔得短時間內猛食，否則一定同佢死過，各位肉食系師兄師姐必定唔可以錯過。
最後提示:
可能你會以為自己好拆得，一碟八片嘅和牛算係咩，十碟八碟閒閒哋。事實係，咁肥嘅牛，食得多都真係會膩。
