小曼谷泰國美食 (教育路) (已結業)

朋友好似半個泰國仔，成日都要食泰菜，年年都去幾次bangkok，佢話未夠期回鄉，又掛住家鄉菜，今次近近哋陪佢喺元朗食個泰菜頂下癮先。元朗泰國餐廳我哋都試勻哂。反而未食過九龍城名店小曼谷係元朗新開嘅分店，一於試下先。先整個泰式特飲，呢個芒果椰汁沙冰好香甜。再叫左個泰式青檸梳打，不過呢個青檸梳打唔係好有夠氣同埋都幾甜。泰式生蝦正呀！大冬陰功湯，分量夠曬五六個人飲， 酸辣到適中，入面仲有幾隻大蝦。邊爐魚用上桂花魚都幾重本，幾特別。湯底估佢唔到原來都幾辣， 桂花魚肉好甜好嫩滑。泰式鹹魚炒椰菜苗，椰菜苗好爽嫩。咖哩軟殼蟹法包好正，咖哩味夠香濃香甜，法包好軟熟一啲都唔硬！終於唔使去九龍城都食到小曼谷！