今次同一個朋友嚟食，我哋六點半已到，當時人唔算好多，服務員態度真係幾好，幾熱情咁推介餐單，而就算我哋用咗成20分鐘翻餐牌，亦問咗唔少問題，佢哋都好耐心。
但最後，我哋點嘅都係最出名嗰兩個：Fish and Chips, Wellington Beef。
上主菜前先嚟麵包，係幾好食嘅，口感鬆軟，尤其落埋牛油，真係好夾。
Fish and Chips：魚炸得外脆內嫩，口感剛好。薯條講真就冇咩特色，亦真係只蘸他他醬先配，另一個醬味道極怪......
Wellington Beef：一上檯見每人兩塊都目瞪口呆，因為真係好大塊。用酥皮包住牛柳同蘑菇醬，牛柳好嫩，牛味幾濃，另外兩樣嘢當然冇咩特色，而成個菜整體味道都偏淡，要蘸個燒汁嚟食，汁料味道就普通啦。而且比較唔好嘅係細嗰件一夾過碟嗰陣會散，好在厚嗰件就冇問題。
另外叫咗杯Mocktail，酸酸甜甜幾啱胃口。
本來嘅打算係試完兩樣名菜再叫其他嘢，但我哋兩個食完呢樣嘢後已飽到連甜品都食唔落......
嚟得呢度就預咗唔會平，不過只係食咗兩道菜加兩杯飲品，埋單每人唔使700，還可以啦。
整體水平唔錯嘅，但真係未至於好出色。或者要再試其他嘢先知，畢竟今次食嘅嘢太少。
